Եթե դուք փորձեք 40 աստիճան ջերմությամբ թոքաբորբով հիվանդներին պաղպաղակ վաճառել, կստացվի՞: Նույնիսկ եթե համոզեք նրանց, որ դա ոչ թե պաղպաղակ է, այլ կարկանդակ: Իսկ գիտե՞ք, թե որն է պաղպաղակի և ՀՀԿ-ի նմանությունը. Հանրապետական կուսակցությունը պետության առողջության համար նույնն է, ինչ սառը պաղպաղակը թոքաբորբով հիվանդի: Բայց այն փորձում են վաճառել մարդկանց, երբեմն ներկայացնելով այլ կերպարանքով՝ ասես կարկանդակ: Իսկ հիվանդի ջերմությունը գնալով բարձրանում է, հատելով ջերմաչափի սահմանները, և պաղպաղակը թթվում է նրա ստամոքսում՝ առնվազն 5 տարով:

Որպեսզի դու ստեղծես արդար օրենքներ, արդեն իսկ պետք է լինես այնպիսին, ինչպիսին ցանկանում ես, որ մարդիկ դառնան՝ քո ստեղծած օրենքների արդյունքում: Ժան Ժակ Ռուսսոյի այս բանաձևը վերաբերում է նաև Հայաստանի կառավարությունը, որը հայտարարել է, թե ցանկանում է պայքարել կոռուպցիայի և մենաշնորհների դեմ: Եթե դու կաշառակեր ես, չես կարող ստեղծել հավասար հնարավորություններ բոլորի համար, եթե դու ընտրվել ես կեղծիքներով, չես կարող կառուցել ժողովրդավարություն, որովհետև իշխանությունը պահում են ճիշտ այն մեթոդներով, որոնցով այն ձեռք է բերվել: Ոչ ոք չի կտրի այն ճյուղը, որի վրա ինքն է նստած, եթե իհարկե, իրեն չեն պատրաստվում այդ ճյուղի վրա կախել: